As ek die lot kon kies

Maart 23, 2010

As ek die lot kon kies
Van elke mens op aarde,
(Net my hart wat my begelei)
Sou ek by hierdie formule bly:

Geen genade vir die een wat trap op geboë rûe
Of een wat kerm oor geringste kwale,
Wat lê en stagneer in louwarm water
En sug oor krake in die mure waar mos vergader.

My hand is oop vir die hand wat klippe uit paaie rol.
My hart gaan uit na warm harte wat graag
Die vreemdeling met glimlag groet en ook
Na mense wat innig breek as hul ‘n ander sien ween.

Ek wens vir die een wat neem, misnoeë;
Vir die een wat hou, verveeldheid;
Vir die een wat gee, nóg meer
Liefde en voldoening.